Mur għall-kontenut ewlieni
Bandiera tal-Unjoni Ewropea
Malti
#EndGenderStereotypes

Bilanċ bejn ix-xogħol u l-ħajja privata

A father dressed to go to work combs the hair of his daughter before shcool.
Mhux tas-soltu?

#EndGenderStereotypes

Il-missirijiet jieħdu ħsieb it-tfal ukoll!

X’jiġi f’moħħok meta tara missier jagħmel xagħar bintu? Tara xi ħaġa mhux tas-soltu?

L-istereotipi marbuta mal-ġeneru jillimitawna lkoll. Ejjew infarrkuhom u niftħu dinja ta’ possibbiltajiet! L-indukrar u x-xogħol professjonali mhumiex limitati għal ġeneru wieħed. Wasal iż-żmien li tintemm il-pressjoni mis-soċjetà u jinħolqu opportunitajiet indaqs għal kulħadd biex wieħed jirnexxi kemm fil-ħajja personali kif ukoll f’dik professjonali tiegħu. Flimkien, nistgħu noħolqu dinja aktar ibbilanċjata bejn il-ġeneri u ugwali.

Insibu bilanċ: Ejjew niġġieldu l-istereotipi marbuta mal-ġeneru

In-nisa jkomplu jassumu sehem sproporzjonat tar-responsabbiltajiet tal-indukrar tat-tfal. L-ommijiet għandhom probabbiltà akbar mill-missirijiet li jaħdmu part-time, jieqfu mill-karrieri tagħhom, jew inaqqsu l-ambizzjonijiet professjonali tagħhom. Dan iżid mal-fatt li bħala medja, in-nisa jitħallsu inqas fis-siegħa  mill-irġiel, u għandu impatt negattiv fuq il-pensjonijiet tagħhom, u jħallihom aktar vulnerabbli għall-esklużjoni soċjali u l-faqar. Introjtu ieħor fil-familja jista’ jipprevjeni r-riskju tal-faqar. Ir-responsabbiltajiet ta’ indukrar jeħtieġ li jinqasmu aħjar bejn iż-żewġ ġenituri u jiġu appoġġati minn servizzi ta’ indukrar tat-tfal ta’ kwalità għolja u għall-but ta’ kulħadd. Dan huwa wkoll ta’ benefiċċju għat-tfal. Il-miżuri ta’ bilanċ bejn ix-xogħol u l-ħajja privata jistgħu jagħtu wkoll lok għal flessibbiltà – dan jista’ jkun ta’ benefiċċju, pereżempju, b’mod partikolari għal ġenituri waħedhom.



Miżuri li jippromovu kompatibbiltà akbar bejn ix-xogħol u l-ħajja tal-familja jistgħu jgħinu biex tinkiseb l-ugwaljanza bejn il-ġeneri. Dawn iħeġġu lill-irġiel u lin-nisa biex jaqsmu r-responsabbiltajiet tal-kura b’mod ugwali u jagħmluha aktar faċli għan-nisa biex jidħlu jew jirritornaw għax-xogħol imħallas wara perjodu ta’ liv minħabba raġunijiet familjari. Bilanċ b’saħħtu tal-ħajja personali u professjonali jista’ jikkontribwixxi wkoll għall-kuntentizza ġenerali tal-ġenituri.

Father feeding kid while mother is sleeping

Il-bilanċ bejn ix-xogħol u l-ħajja privata u aċċess aħjar għas-servizzi tal-kura tat-tfal huma promossi mill-politiki tal-UE bħad-Direttiva dwar il-Bilanċ bejn ix-Xogħol u l-Ħajja Privata u l-Istrateġija Ewropea dwar il-Kura. Inti, bħala impjegat, impjegatur, jew ġenitur, tista’ wkoll tieħu passi żgħar: Bħala impjegatur, oħloq bilanċ aħjar bejn ix-xogħol u l-ħajja privata għall-impjegati tiegħek. Bħala ġenitur, tista’ taqsam ir-responsabbiltajiet tal-ġenituri u tad-dar. Dawn l-aġġustamenti żgħar se jkunu ta’ benefiċċju għalina lkoll!

Young girl with blonde hair getting her hair combed by her father.

Naraw lil hinn mill-figuri

44% tal-Ewropej jaħsbu li l-aktar rwol importanti ta’ mara huwa li tieħu ħsieb darha u familtha.
82% tal-persuni li jaħdmu part-time minħabba raġunijiet ta’ kura huma nisa.
21% tal-irġiel qattgħu aktar minn 5 sigħat kuljum jieħdu ħsieb uliedhom, meta mqabbla ma’ 40% tan-nisa.

Sorsi:
Ewrobarometru speċjali 465: Gender Equality 2017
EUROSTAT Reconciliation of work and family life - statistics
EIGE’s Upcoming Survey of Gender Gaps in Unpaid Care, Individual and Social Activities, 2022.


L-indirizzar tal-istereotipi marbuta mal-ġeneru fil-prattika

L-uniku mod biex negħlbu l-istereotipi marbuta mal-ġeneru huwa billi nieħdu azzjonijiet konkreti u nħeġġu l-parteċipazzjoni ugwali tan-nisa u tal-irġiel fl-aspetti kollha tal-ħajja. Sir af aktar dwar xi proġetti ffinanzjati mill-UE li jindirizzaw l-istereotipi marbuta mal-ġeneru:

Daugiau balanso logo
Everybody’s Talking: Il-bilanċ bejn ix-Xogħol u l-Ħajja Jsir Mainstream (BALANCE)

Fil-Litwanja, l-istereotipi marbuta mal-ġeneru u d-differenzi bejn il-ġeneri jaffettwaw il-possibbiltajiet ta’ karriera tan-nisa u l-ħajja tal-familja tal-irġiel. Attivitajiet minn dan il-proġett ippromovew il-qsim tar-responsabbiltajiet ta’ kura bejn l-ommijiet u l-missirijiet u rikonċiljazzjoni aħjar bejn il-ħajja personali u professjonali kemm għan-nisa kif ukoll għall-irġiel.

Co-Funded by the European Union logo
Bilanċ għal kulħadd (B4A)

L-indukrar tat-tfal, il-kura tal-anzjani, u l-għażliet tax-xogħol flessibbli jistgħu jkunu limitati. Balance for All (B4A) iġġieled l-istereotipi marbuta mal-ġeneru fis-soċjetà Latvjana u pprovda materjal metodoloġiku għall-impjegaturi u rakkomandazzjonijiet għat-trade unions biex jiġi promoss il-bilanċ bejn ix-xogħol u l-ħajja privata fil-ftehimiet kollettivi.

The Peace Institute logo
ACTION DAD (Action Dad)

L-għan ġenerali tal-proġett huwa li jikkontribwixxi għas-sensibilizzazzjoni tal-ġenituri, tal-impjegaturi, u tal-pubbliku ġenerali fis-Slovenja dwar l-importanza li l-irġiel jiġu involuti b’mod attiv fil-paternità billi jinkoraġġixxi distribuzzjoni aktar ugwali tal-kura tal-ġenituri mill-mument tat-twelid.

Dione logo
Tkeċċija u trattament sfavorevoli ta’ Nisa fil-Post tax-Xogħol Grieg: L-adozzjoni ta' approċċ ta' intervent Integrat u Sistemiku (DIONE)

DIONE indirizza l-kwistjoni tat-tkeċċija tan-nisa matul u wara t-tqala u t-trattament sfavorevoli tagħhom matul il-liv tal-ġenituri. Permezz tal-iżvilupp ta’ pjattaforma ta’ informazzjoni online, il-proġett appoġġa lil nisa vittmi ta’ approċċ diskriminatorju u għen lill-awtoritajiet pubbliċi u lill-atturi tas-suq tax-xogħol jipprevjenu tali diskriminazzjoni.

Parents Work logo
L-involviment ta’ min iħaddem u t-titjib tas-sejbien tad-diskriminazzjoni bejn is-sessi biex tiġi żgurata protezzjoni adegwata għall-ġenituri fuq ix-xogħol (Ġenituri fuq ix-xogħol)

Li wieħed jinforma lill-impjegaturi dwar l-obbligi tagħhom rigward il-bilanċ bejn ix-xogħol u l-ħajja privata huwa importanti daqs li wieħed jinforma lill-impjegati dwar id-drittijiet tagħhom. Bil-promozzjoni ta’ linji gwida dwar l-aħjar prattika u t-taħriġ tal-ispetturi tax-xogħol dwar il-protezzjoni legali tal-ġenituri fuq il-post tax-xogħol, dan huwa preċiżament dak li dan il-proġett ifittex li jagħmel.

Work-life balance logo
Il-promozzjoni tal-bilanċ bejn ix-xogħol u l-ħajja privata fil-kumpaniji u qsim aħjar tal-kura bejn l-irġiel u n-nisa (SHARE)

SHARE ippromwova postijiet tax-xogħol u attivitajiet favur il-familja li jippermettu lill-impjegaturi u lill-impjegati jirrikonċiljaw ix-xogħol u l-ħajja privata. Dan ipproduċa metodoloġija biex tinħoloq tikketta dwar l-ugwaljanza bejn il-ġeneri għall-kumpaniji. Barra minn hekk, identifika wkoll l-aħjar prattiki u qajjem kuxjenza fost il-kumpaniji parteċipanti dwar kwistjonijiet ta’ ugwaljanza bejn il-ġeneri fis-settur korporattiv.


Ejjew nieħu azzjoni flimkien!

Trid tiġġieled l-istereotipi u tgħin biex tippromwovi l-ugwaljanza bejn il-ġeneri? Biex tgħin tqajjem kuxjenza dwar dan is-suġġett, xerred il-materjal tal-kampanja bil-hashtag #EndGenderStereotypes.

Kulħadd għandu s-setgħa li jġib bidla!

 

Tixtieq tkun taf aktar?

Ikklikkja fuq it-temi ta’ hawn taħt biex tiskopri fejn u kif l-istereotipi marbuta mal-ġeneru sawru d-dinja tagħna u kif nistgħu nimxu ’l quddiem flimkien.